|
Լ.Մկրտչյանի հարցազրույցը Սերգեյ Կարյակինի հետ |
-Սերգեյ, շնորհավորում եմ քեզ ամուսնության կապակցությամբ: Կնոջդ` Եկատերինային, արդեն ուղղել եմ ընտանեկան հարցեր, այժմ ցանկանում եմ մի փոքր զրուցենք շախմատի շուրջ: Քանի որ մրցաշարը նվիրված է աշխարհի իններորդ չեմպիոն Տիգրան Պետրոսյանի 80-ամյակին, կցանկանայի իմանալ քո կարծիքը մեր լեգենդար հայրենակցի մասին: Ի՞նչ օգտակար նյութ ես քաղել նրա պարտիաներից:
- Շնորհակալություն Լիլիթ: Իհարկե, ինչպես և մյուս աշխարհի չեմպիոնների պարտիաները, խորը ուսումնասիրել եմ Տ.Պետրոսյանի խաղը: Շատ հետաքրքիր հակագրոհային ոճի շախմատիստ էր: Նրա պարտիաներից ինձ հատկապես հոգեհարազատ են որակի հայտնի զոհաբերությունները և բլոկադան:
-Ի՞նչ կարծիքի ես Ֆիշերի շախմատի մասին:
-Ինձ շատ հետաքրքիր է խաղալ և դիտել Ֆիշերի շախմատը: Ես երկու անգամ հաճույքով մասնակցել եմ Մայնցի մրցաշարում: Վատ է, որ միայն մեկ մրցաշար կա տարվա մեջ, կցանկանայի ավելի հաճախ մասնակցել նմանատիպ մրցաշարերի:
-Ամբողջությամբ վստահում ես համակարգչի գնահատականներին, թե՞ հաճախ չես համաձայնվում:
-Իհարկե լիովին վստահել համակարգչի գնահատականներին չի կարելի: Պետք է ուշադիր ուսումնասիրել առաջարկած բոլոր տարբերակները և հետո միայն այն կիրառել: Օրինակ Բաքրոյի հետ պարտիայում, կարծում եմ, Էտյենը սկզբնախաղում հետևեց համակարգչի ցույց տված գնահատականին, որը սևերի դրությունը նորմալ էր գնահատում, մինչդեռ սպիտակների դրությունը գերադասելի էր: Դա տիպիկ համակարգչային սխալ է: Պետք է շարժվել «վստահիր, բայց ստուգիր» նշանաբանով:
-Քո կարծիքը Անանդ-Թոփալով մրցախաղի մասին: Որո՞նք են այս երկու հսկաների թույլ տեղերը:
- Շատ հետաքրքիր և դժվար մրցախաղ է սպասվում: Դժվարանում եմ ասել, թե ով կհաղթի, երկուսն էլ շատ ուժեղ մրցակիցներ են: Թույլ տեղեր գրեթե չունեն, եթե ունեն էլ ապա այս ընթացքում կաշխատեն շտկել:
-Ինչ ես կարծում, ի՞նչ պետք է անել շախմատը ավելի մասսայական դարձնելու համար:
-Կարծում եմ պետք է լինի արհեստավարժ կազմակերպություն: Չեմ ուզում վատ խոսել ՖԻԴԵ ի կամ կոնկրետ որևէ մեկի հասցեին, բայց կարծում եմ, որ ՖԻԴԵ ն լիովին չի կարողանում լուծել իր առջև դրված խնդիրները:
- Ինչպես ես խաղում,երբ կողքիդ է քո կինը:
-Դե սա իմ առաջին փորձն է (ծիծաղում է) և կարծում եմ վատ չեմ սկսել մրցաշարը: Ես զգում եմ կնոջս աջակցությունը: Ապագայում ևս մենք պատրաստվում ենք մեկնել մրցաշարերի միասին:
-Քո զգացողությունները Ջերմուկում:
-Մենք ամեն օր զբոսնում ենք բնության գրկում, խմում ենք Ջերմուկի հայտնի հանքային ջուրը: Այստեղ հաճելի է` բնությունը գեղեցիկ է, իսկ օդը շատ մաքուր:
|
